ဇွန် ၁၀
ပြင်သစ်အသင်း တိုက်စစ်မှူး ဘန်ဇီမာ၏ ဒဏ်ရာမှာ ထင်မှတ်ထားသလောက် ပြင်းထန်ခြင်းမရှိဟု နည်းပြဒေးရွှမ့်က ပြောကြားခဲ့ကြောင်း သိရသည်။
အသက် ၃၃ နှစ်အရွယ်ရှိ ဘန်ဇီမာသည် ဇွန် ၈ ရက်က ယှဉ်ပြိုင်ကစားခဲ့သည့် ခြေစမ်းပွဲစဉ်အဖြစ် ပြင်သစ် အသင်းနှင့် ဘူဂေးရီးယားအသင်းတို့၏ ပွဲစဉ်တွင် ဒဏ်ရာရရှိခဲ့ခြင်းဖြစ်သည်။ အဆိုပါ ပွဲစဉ်တွင် ပြင်သစ်က ဘူဂေးရီးယားကို ၃ ဂိုး၊ ဂိုးမရှိဖြင့် အနိုင်ရရှိခဲ့သည်။
ကနဦးတွင် ဘန်ဇီမာ၏ဒဏ်ရာမှာ ပြင်းထန်ဖွယ်ရှိသည်ဟု မီဒီယာများက ဖော်ပြခဲ့ကြသော်လည်း စိုးရိမ်စရာမရှိကြောင်း နည်းပြဒေးရွှမ့်က အတည်ပြု ပြောကြားခဲ့ခြင်းဖြစ်သည်။
"သာမန်အပေါ့စား ဒဏ်ရာလေးပါပဲ။ ကြွက်သားဒဏ်ရာဖြစ်ပြီး ဘန်ဇီမာအနေနဲ့ မစွန့်စားချင်တာကြောင့် လူစားလဲခဲ့တာပါ။ ဘဝမှာဆိုးရွားတဲ့အရာတွေက ဖြစ်ပါတယ်။ ဒါပေမဲ့ ကျွန်တော်တို့မှာ စွမ်းရည်မြင့် ဆရာဝန်တွေရှိပြီး ဘန်ဇီမာရဲ့ ဒဏ်ရာကို အကောင်းဆုံးကုသနိုင်ပါလိမ့်မယ်"ဟု နည်းပြ ဒေးရွှမ့်က ပြောကြားခဲ့သည်။ (သူရိန်)