မြို့နယ်အချို့တွင် ဆူပူအကြမ်းဖက်မှုများတွင် အသုံးပြုမည့် လက်နက်၊ ပစ္စည်း၊ ကိရိယာ များအား သိမ်းဆည်းရမိ
မန္တလေး မေ ၁၈
မေ ၁၆ ရက်၊ နံနက် ၅ နာရီအချိန်တွင် မန္တလေးတိုင်းဒေသကြီး၊ အောင်မြေသာစံမြို့နယ်၊ မြောက်ပြင်ရပ်ကွက်နေ ဇော်လင်းထွန်း (၄၁)နှစ်၊ (ဘ)ဦးညွန့်လင်းအား လက်လုပ်မိုင်း ၁၉ လုံး၊ ဆက်စပ် ပစ္စည်းများနှင့်လည်းကောင်း၊ ညနေ ၄ နာရီခွဲခန့်တွင် မိတ္ထီလာမြို့၊ နယ်မြေရဲစခန်းမှ ရာဇသတ်ကြီးပုဒ်မ ၅၀၅-က အမှုမှ တရားခံဖြစ်သူ ဝန်ဇင်းရပ်ကွက်နေ ထိန်မင်းခိုင်(၅၇)နှစ်၊ (ဘ)ဦးဘထိန်အားဖမ်းဆီး ရမိရေးအတွက် ၎င်း၏နေအိမ်သို့ ဝင်ရောက်ရှာဖွေခဲ့ရာ ၎င်းအား မတွေ့ရှိရဘဲ ၎င်း၏သားဖြစ်သူ အောင်ခန့်မင်းထိန် (၂၁)နှစ်အား နေအိမ်အတွင်းမှ မီးစာတပ်ဆင်ထားသော ဓာတ်ဆီပုလင်း ၂ လုံး၊ ဓာတ်ဆီများထည့်ထားသော ပုလင်း ၂ လုံးနှင့် ဆက်စပ် ပစ္စည်းများနှင့်လည်းကောင်း၊ ည ၁၀ နာရီခန့်တွင် ရှမ်းပြည်နယ် (အရှေ့ပိုင်း)၊ မိုင်းယောင်းမြို့၊ အမှတ်(၉)ရပ်ကွက်နေ ဦးစိုင်းမိုးရှိန်း (၂၆)နှစ်(ဘ) ဦးတင်ရှိန်း နှင့် ဦးမင်းအောင်(၄၁)နှစ်(ဘ)ဦးဌေးအောင် တို့အား လေသေနတ်တစ်လက်စီနှင့် ဆက်စပ်ပစ္စည်းများအား ထိန်းသိမ်းရမိခဲ့ကြောင်း သိရသည်။ ဆွေဦး
