ဧပြီ ၂၅
ယူနီဗာဆယ်ရုပ်ရှင်ကုမ္ပဏီနှင့် မက်တဲရုပ်ရှင်ကုမ္ပဏီတို့၏ Rock’EmSock’Em အမည်ရှိ အက်ရှင် ဇာတ်ကားသစ်၌ ကမ္ဘာကျော်အက်ရှင်မင်းသားဗင်ဒီဆယ် ပါဝင်သရုပ်ဆောင်မည်ဖြစ်ကြောင်း သိရသည်။
မင်းသားဗင်ဒီဆယ်သည် ဂန္ထဝင် လက်ဝှေ့ဂိမ်းတစ်ခုကိုအခြေခံရိုက်ကူးမည့် Rock’EmSock’Em ဇာတ်ကား၌ ပါဝင်သရုပ်ဆောင်မည့်အပြင် ထုတ်လုပ်သူအဖြစ်လည်းတာဝန်ယူမည်ဖြစ်သည်။
မက်တဲရုပ်ရှင်ကုမ္ပဏီနှင့် ယူနီဗာဆယ်ရုပ်ရှင်ကုမ္ပဏီတို့ဖြင့် လက်တွဲ၍ Rock’EmSock’Em ဇာတ်ကားကို ရုပ်ရှင်ဇာတ်ကားအဖြစ်အသက်သွင်းခွင့်ရသည့်အတွက် မိမိအနေဖြင့် ဝမ်းမြောက်ပျော်ရွှင်မိကြောင်း ဗင်ဒီဆယ် က ပြောကြားထားသည်။
အဆိုပါ ဇာတ်ကားအတွက် ဇာတ်ညွှန်းကို Rampage ဇာတ်ညွှန်းရေးဆရာရိုင်ယန်အင်ဂယ်ကတာဝန်ယူရေးသားပေးမည်ဖြစ်ပြီး အဆိုပါဇာတ်ကားကိုတာဝန်ယူရိုက်ကူးမည့် ဒါရိုက်တာကိုယူနီဗာဆယ်နှင့် မက်တဲ ရုပ်ရှင်ကုမ္ပဏီတို့က ကြေညာခြင်းမရှိသေးကြောင်း သိရသည်။ (သူရိန်)