ဖားကန့်၌ ချေးငွေကျပ်သုံးသိန်းရလိုမှုဖြင့် လူသတ်မှုဖြစ်ပွား
ဖားကန့် ဧပြီ ၂၄
ကချင်ပြည်နယ် ဖားကန့်မြို့နယ်၌ ဧပြီ ၂၂ရက်က ချေးငွေကျပ်သုံးသိန်းရလိုမှုဖြင့် စကားများရန်ဖြစ်ရာမှ ဓားဖြင့်ခုတ်မှု ဖြစ်ပွားခဲ့ရာ အမျိုးသားတစ်ဦးသေဆုံးခဲ့ကြောင်း ဖားကန့်မြို့မရဲတပ်ဖွဲ့စခန်းမှသိရသည်။
ဖြစ်စဉ်မှာ ဧပြီ ၂၂ ရက် နံနက် ၉ နာရီခွဲက ဖားကန့်မြို့နယ်၌ ဂျာနယ်ရောင်းချသည့် ဦးကျော်ငြိမ်း(ခ)ဂျာနယ်သည် ပြတ်ရှဒဏ်ရာများဖြင့် ၎င်း၏ နေအိမ်ဖြစ်သည့်ဆိပ်မူကျေးရွာ ရပ်ကွက်သို့ပြန်လည်ရောက်ရှိ လာပြီးနောက် ရရှိဒဏ်ရာများဖြင့် သေဆုံးသွားခဲ့သည်။
၎င်းမသေဆုံးမီပြောကြားချက်အရ လွန်ခဲ့သည့် နှစ်နှစ်ခန့်က ချေးငွေသုံးသိန်းချေးယူခဲ့ပြီး ပြန်လည်ပေးဆပ်နိုင်ခြင်းမရှိသည်နှင့်ပတ်သက်၍ ငွေရှင် ဒေါ်ခိုင်ခိုင်သွယ်နှင့် ဆိပ်မူ-ဖားကန့်သွား လမ်းဘေးရှိ ဒေါ်ခိုင်ခိုင်သွယ်၏ နေအိမ်ရှေ့တွင် ထပ်မံစကားများရာ ဒေါ်ခိုင်ခိုင်သွယ်က ဓားဦးပြတ်ဓားမဖြင့် ခုတ်သဖြင့် ဒဏ်ရာများရရှိခဲ့ခြင်းဖြစ်ကြောင်း သိရသည်။
ဖြစ်စဉ်နှင့်ပတ်သက်၍ ဒေါ်ခိုင်ခိုင်သွယ်အား ဖမ်းဆီးကာ ဖားကန့်မြို့နယ် မြို့မရဲတပ်ဖွဲ့စခန်းက အမှုဖွင့် အရေးယူထားကြောင်း သိရသည်။
ဆွေဦး
