ဗန်းမော်၊ မိုးညှင်း၊ မြိတ်မြို့နယ်တို့၌ စိတ်ကြွရူးသွပ်ဆေးပြားများ သိမ်းဆည်းရမိ
ဗန်းမော် ဧပြီ ၂၄
မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဧပြီ ၂၂ ရက် နံနက် ၉ နာရီတွင် ဗန်းမော်မြို့ ရွှေပြည်သာရပ်ကွက်တွင် ထက်မြက်ဆွေမောင်းနှင်လာသည့် ဆိုင်ကယ်ကို ရပ်တန့်စစ်ဆေးရှာဖွေရာ စိတ်ကြွရူးသွပ်ဆေးပြား ၁၉၀၀ နှင့် ဆေးပြားအကြေ သုည ဒသမ ၀၀၂၈ ကီလိုတို့ကိုလည်းကောင်း၊ အလားတူယင်းနေ့ ညနေ ၄ နာရီခွဲတွင် မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့မှ တပ်ဖွဲ့ဝင်များသည် မိုးညှင်းမြို့နယ် နန့်ပုတ်ကျေးရွာအနီးတွင် ဝင်းနိုင်ဦး မောင်းနှင်ပြီး မျိုးသူ လိုက်ပါလာသည့် ဆိုင်ကယ်ကို ရပ်တန့်စစ်ဆေးရှာဖွေရာ ဘိန်းဖြူ သုည ဒသမ ၆၆ ကီလိုကိုလည်းကောင်း၊ ထို့အတူ ယင်းနေ့ မွန်းလွဲ ၁ နာရီခန့်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင် သောပူးပေါင်းအဖွဲ့သည် မြိတ်မြို့နယ် ကလွင်ကျေးရွာအနီး မြို့ပတ်(၂)လမ်းတွင် မသင်္ကာဖွယ်တွေ့ရှိသူ ထွန်းမင်းလတ်(ခ)ဝက်ကြီးကို စစ်ဆေးရှာဖွေရာ စိတ်ကြွရူးသွပ်ဆေးပြား ၁၅၂၂ ပြား သိမ်းဆည်းရမိခဲ့ပြီး စစ်ဆေးပေါ်ပေါက်ချက်အရ စန္ဒဝတ်ကျေးရွာနေ ထက်ပိုင်မျိုး၏နေအိမ်ကို ဝင်ရောက်ရှာဖွေရာ ၎င်းနှင့်အတူ ဇော်မင်းစိုး(ခ)ဂျာလာလူဒင်ကိုတွေ့ရှိရပြီး စိတ်ကြွရူးသွပ်ဆေးပြား ၈၀၉၅ ပြား၊ အိုက်စ် သုည ဒသမ ၂၁၅ ကီလိုနှင့်ဆိုင်ကယ်တစ်စီးတို့ကိုလည်းကောင်း သိမ်းဆည်းရမိခဲ့သဖြင့် ၎င်းတို့အား မူးယစ်ဆေးဝါးနှင့်စိတ်ကို ပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားကြောင်း သိရသည်။
ဆွေဦး
