ပွင့်ဖြူမြို့နယ် ညောင်ပင်ရွာကျေးရွာ၌ နေအိမ်လေးလုံး မီးလောင်
ပွင့်ဖြူ ဧပြီ ၂၂
မကွေးတိုင်းဒေသကြီး ပွင့်ဖြူမြို့နယ် ညောင်ပင်ရွာ ကျေးရွာ၌ ဧပြီ ၂၁ ရက် နံနက် ၁၀ နာရီခန့်က ထင်းမီးဖြင့် ကွမ်းသီးပြုတ်ရာမှ နေအိမ်လေးလုံး မီးကူးစက်လောင်ကျွမ်းခဲ့ကြောင်း သိရသည်။
ဖြစ်စဉ်မှာ ပွင့်ဖြူမြို့နယ် ညောင်ပင်ရွာကျေးရွာနေ ဦးရာဇာ၏နေအိမ်တွင် ထင်းမီးဖြင့် ကွမ်းသီးပြုတ်ရာမှ ထရံသို့ မီးကူးစက်လောင်ကျွမ်းခဲ့ပြီး အနီးရှိ နေအိမ်သုံးလုံး မီးလောင်ကျွမ်းခဲ့ကြောင်းသိရသည်။
အဆိုပါ မီးလောင်ရာသို့ ပွင့်ဖြူမြို့နယ် မီးသတ်ဦးစီးဌာနမှ ဒုတိယမီးသတ်ဦးစီးမှူး ဦးမျိုးထွဋ်ခိုင် ဦးဆောင်သော မီးသတ်တပ်ဖွဲ့ဝင်များ၊ ပွင့်ဖြူမြို့မရဲစခန်းမှ ဒုရဲမှူး စိုးခိုင်ဦးဆောင်သော ရဲတပ်ဖွဲ့ဝင်များ ပူးပေါင်းအဖွဲ့က မီးငြိမ်းသတ်ယာဉ်တစ်စီး၊ ရေသယ်ယာဉ်တစ်စီးတို့ဖြင့် ဒေသခံပြည်သူများနှင့်အတူ ဝိုင်းဝန်း ငြိမ်းသတ်ခဲ့ကြရာ နံနက် ၁၀ နာရီခွဲတွင် မီးငြိမ်းသွားခဲ့ကြောင်းနှင့် မီးလောင်မှုကြောင့် လူနှင့်တိရစ္ဆာန် ထိခိုက်ဆုံးရှုံးမှုမရှိကြောင်း သိရသည်။
အဆိုပါမီးလောင်မှုနှင့်ပတ်သက်၍ ပွင့်ဖြူမြို့မရဲစခန်းက မီးပေါ့ဆသူ ဦးရာဇာအား အမှုဖွင့်အရေးယူဆောင်ရွက်ထားကြောင်း သိရသည်။
ဆွေဦး
