လှိုင်သာယာ(အနောက်ပိုင်း)နှင့် တာမွေမြို့နယ်တို့၌ မီးလောင်မှုဖြစ်ပွား

ရန်ကုန် ဧပြီ ၂၂

ရန်ကုန်တိုင်းဒေသကြီး လှိုင်သာယာ(အနောက်ပိုင်း)မြို့နယ် မြစိမ်းရောင်စက်မှုဇုန် မြရတနာလမ်း အကွက်အမှတ်(၁၆)ရှိ Steel Structure တစ်ထပ် Yangon Materials ပန်းချီပေါင်စက်ရုံ၌ ဧပြီ ၂၀ ရက် ည ၁၁ နာရီ မိနစ် ၅၀ ခန့်တွင် မီးလောင်မှုဖြစ်ပွားခဲ့သည်။
မီးလောင်မှုဖြစ်ပွားရာနေရာသို့ နယ်မြေခံတပ်မတော်သားများ၊ မြန်မာနိုင်ငံရဲတပ်ဖွဲ့ဝင်များ၊ မီးသတ် တပ်ဖွဲ့ဝင်များ သွားရောက်၍ မီးသတ်ယာဉ် ငါးစီး၊ ရေသယ်ယာဉ်သုံးစီးတို့ဖြင့် ဝိုင်းဝန်းငြိမ်းသတ် ခဲ့သဖြင့် ည ၁၁ နာရီ ၅၉ မိနစ်ခန့်တွင် မီးငြိမ်းသွားခဲ့ပြီး အဆိုပါ မီးလောင်မှုကြောင့် လူနှင့်တိရစ္ဆာန်များ ထိခိုက်ဒဏ်ရာရရှိမှု မရှိကြောင်းနှင့် စက်ရုံရှိပစ္စည်းများ မီးလောင်ပျက်စီးခဲ့ကြောင်း သိရသည်။

ထို့အတူ တာမွေမြို့နယ် ပင်ရွှေညောင်လမ်းနှင့် မာလာနွယ်လမ်းထောင့်ရှိ မြို့နယ် NLD ရုံး၌ ဧပြီ ၂၁ ရက်၊ နံနက် ၅ နာရီခန့်တွင် မီးလောင်ကျွမ်းမှုဖြစ်ပွားခဲ့သဖြင့် နယ်မြေခံတပ်မတော်သားများ၊ မြန်မာနိုင်ငံရဲတပ်ဖွဲ့ဝင်များ၊ မီးသတ်တပ်ဖွဲ့ဝင်များ သွားရောက်၍ မီးသတ်ယာဉ် ခုနစ်စီးဖြင့် ဝိုင်းဝန်း ငြိမ်းသတ်ခဲ့ရာ နံနက် ၅ နာရီ မိနစ်၂၀ ခန့်တွင် မီးငြိမ်းသွားခဲ့ပြီး အဆိုပါမီးလောင်မှုကြောင့် လူနှင့်တိရစ္ဆာန် များ ထိခိုက်ဒဏ်ရာရရှိမှုမရှိကြောင်းနှင့် ယာဉ်တစ်စီး မီးလောင်ပျက်စီးခဲ့ကြောင်း သိရသည်။

ဆွေဦး