ဗန်းမော်မြို့နယ်၌ ငွေကျပ်သိန်း ၁၉ဝဝ ကျော် တန်ဖိုးရှိ မူးယစ်ဆေးဝါးများ သိမ်းဆည်းရမိ

ဗန်းမော် ဧပြီ ၂၁

ကချင်ပြည်နယ် ဗန်းမော်မြို့နယ်၌ ငွေကျပ်သိန်း ၁၉၀၀ ကျော်တန်ဖိုးရှိ မူးယစ်ဆေးဝါးများ သိမ်းဆည်းရမိခဲ့ကြောင်း သိရသည်။
ဖြစ်စဉ်မှာ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှတပ်ဖွဲ့ဝင်များပါဝင်သော ပူးပေါင်းအဖွဲ့သည် ယနေ့ နံနက် ၉ နာရီခွဲတွင် သတင်းအရ ဗန်းမော်မြို့နယ် နမ့်ဖာရပ်ကွက် ဗန်းမော်-မြစ်ကြီးနားသွားကား လမ်းတွင် ဗန်းမော်မှ မြစ်ကြီးနားသို့ ဇယ်လွမ်း မောင်းနှင်လာသည့် PAJERO အမျိုးအစားယာဉ်ကို ရှာဖွေရာ ယာဉ်၏ ဆီတိုင်ကီအတွင်းမှ ဆပ်ပြာခွက် ၁၀၂ ခွက် ဖြင့်ထည့်လျက် ဘိန်းဖြူ ၁ ဒသမ ၀၂ ကီလိုနှင့် စိတ်ကြွရူးသွပ်ဆေးပြား ၁၁၈၉၅၀ (တန်ဖိုးငွေကျပ်သိန်း ၁၉၈၈ ဒသမ ၂၅ သိန်း)တို့ကို သိမ်းဆည်းရမိခဲ့ပြီး စစ်ဆေးပေါ်ပေါက်ချက်အရ သိမ်းဆည်းရမိ မူးယစ်ဆေးဝါးများအား ရှမ်းပြည်နယ်(မြောက်ပိုင်း) ကွတ်ခိုင်မှ ကချင်ပြည်နယ် (ဝိုင်းမော်)သို့ သယ်ဆောင်ရောင်းဝယ်ခြင်းဖြစ်ကြောင်း သိရှိရသဖြင့် ၎င်းအား မူးယစ် ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများအား စစ်ဆေးဖော်ထုတ်လျက်ရှိကြောင်း သိရသည်။

ဆွေဦး