ရန်ကုန်တိုင်းဒေသကြီး၊ မင်္ဂလာဒုံမြို့နယ်နှင့် ရှမ်းပြည်နယ်၊ ဖယ်ခုံမြို့နယ်တို့တွင် မူးယစ်ဆေးဝါးများ ဖမ်းဆီးရမိ
ရန်ကုန်၊ ဇန်နဝါရီ ၂၁
မူးယစ်ဆေးဝါးများအား အခြားကုန်ပစ္စည်းများနှင့်ရောနှော၍ လွိုင်ကော်-ရန်ကုန် Express ယာဉ်တွင် လူမဲ့တန်ဆာဖြင့်သယ်ဆောင်လာကြောင်း သတင်းအရ မူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့မှ တပ်ဖွဲ့ဝင်များပါဝင်သောပူးပေါင်းအဖွဲ့သည် ရန်ကုန်မြို့၊ အောင်မင်္ဂလာကားဝင်းကားဂိတ်၌ စောင့်ဆိုင်းနေစဉ် ဇန်နဝါရီ ၂၀ ရက်တွင် လူမဲ့တန်ဆာအိတ်များကို လာရောက်ထုတ်ယူသူ ခူးသီအိုဒေါရို နှင့် မိုင်းမိုင်းလင်းကြည်တို့အား ထိန်းသိမ်း၍ရှာဖွေရာ ဆာလာအိတ်များအတွင်း ကြက်သွန်ဖြူနှင့် မြေပဲဆံများကြားတွင် ထည့်သွင်းထားသော စိတ်ကြွရူးသွပ်ဆေးပြား ၃၀,၀၀၀ ပြား သိမ်းဆည်းရမိခဲ့ပါသည်။
ဆက်လက်၍ ယင်းတို့ ၂ ဦးမောင်းနှင်လာသော Crown အမျိုးအစား မော်တော်ယာဉ်ကိုရှာဖွေရာ အဆိုပါ ယာဉ်အတွင်းမှ စိတ်ကြွရူးသွပ်ဆေးပြား ၁၃၆ ပြား၊ အိုက်စ် ၀ ဒသမ ၈ ဂရမ် တို့ကိုသိမ်းဆည်းရမိခဲ့ပြီး စစ်ဆေးပေါ်ပေါက်ချက်အရ ညနေ ၃ နာရီအချိန်တွင် ခူးသီအိုဒေါရိုနေထိုင်သည့် ဖယ်ခုံမြို့၊ ဟိန်ဓမ္မရပ်ကွက်၊ သော်ကလမ်းရှိ နေအိမ်ကိုရှာဖွေရာ ၎င်း၏ဇနီး မမူစကော်လီနာသိန်းအားတွေ့ရှိပြီး နေအိမ်အိပ်ခန်း အတွင်းမှ စိတ်ကြွရူးသွပ်ဆေးပြား ၂၉,၂၅၀ ပြား ထပ်မံသိမ်းဆည်းရမိခဲ့သဖြင့် ခူးသီအိုဒေါရို(၄၀)နှစ်၊ မိုင်းမိုင်းလင်းကြည်(၄၁)နှစ်၊ မမူစကော်လီနာသိန်း(၄၁)နှစ်တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများ ဆိုင်ရာဥပဒေအရ အရေးယူထားကြောင်းနှင့် ခူးသီအိုဒေါရိုမှ ၎င်းမူးယစ်ဆေးဝါးများကို ရှမ်းပြည်နယ်တောင်ပိုင်း၊ နမ့်စန်မြို့နယ်မှ ဝယ်ယူပြီး ၎င်း၏နေအိမ်တွင် သိုလှောင်ထိန်းသိမ်း၍ ရန်ကုန်မြို့သို့ သယ်ယူပို့ဆောင်ဖြန့်ဖြူးသူဖြစ်ကြောင်း သိရသည်။ဆွေဦး
