ချဲလ်ဆီးကစားသမားတိုမိုရီကို အငှားစာချုပ်ဖြင့် ခေါ်ယူရန် အေစီမီလန်အသင်းနီးစပ်နေ
ဇန်နဝါရီ ၁၉
အေစီမီလန်အသင်းသည် ချဲလ်ဆီးအသင်းခံစစ်ကစားသမားတိုမိုရီကိုအငှားစာချုပ်ဖြင့် ခေါ်ယူရန် နှစ်ဖက် အသင်းတာဝန်ရှိသူများဆွေးနွေးခဲ့ရာခေါ်ယူနိုင်ရန် နီးစပ်နေကြောင်းသိရသည်။
အေစီမီလန်အသင်းသည် တိုမိုရီကိုလက်ရှိဘောလုံးရာသီကုန်ထိအငှားစာချုပ်ဖြင့် ခေါ်ယူမည်ဖြစ်ပြီး ရာသီကုန်တွင် စတာလင်ပေါင် ၂၅ သန်းဖြင့် အပြီးသတ်ခေါ်ယူမည်ဖြစ်သည်။
အသက် ၂၃ နှစ်အရွယ်ရှိတိုမိုရီသည် အင်္ဂလန်လက်ရွေးစင်အသင်းတွင် တစ်ပွဲသာပါဝင်ကစားခွင့်ရရှိထား ပြီးချဲလ်ဆီးအသင်းတွင် ပုံမှန်ပွဲထွက်ခွင့်ရရှိရန် ရုန်းကန်နေရသည့်အတွက် ချဲလ်ဆီးအသင်းမှ ထွက်ခွာရန် ပြင်ဆင်နေသူဖြစ်သည်။
ယင်းသည် ချဲလ်ဆီးအသင်းလူငယ်အစီအစဉ်မှ ပေါ်ထွက်ခဲ့ပြီး ချဲလ်ဆီးအသင်းအတွက် ပြိုင်ပွဲစုံပွဲပေါင်း ၂၇ ပွဲကစားပေးထားကာသွင်းဂိုး ၂ ဂိုးသွင်းယူပေးထားသူဖြစ်သည်။
ချဲလ်ဆီးအသင်းနည်းပြ လမ်းပတ်ကတိုမိုရီကိုအသင်းတွင် ပုံမှန်ပွဲထွက်ခွင့် မပေးနိုင်သော်လည်း ယင်းသည် အသင်း၏ အနာဂတ်အစီအစဉ်တွင် ပါဝင်နေဆဲဖြစ်ကြောင်းပြောကြားထားသည်။
(သူရိန်)
