YBS ယာဉ်လိုင်းပေါ်တွင် လိုက်လံခါးပိုက်နှိုက်နေသူ ၄ ဦး ဖမ်းဆီး အရေးယူ
ရန်ကုန်၊ ဇန်နဝါရီ ၁၇
ရန်ကုန်တိုင်းဒေသကြီးရဲတပ်ဖွဲ့မှူးရုံး၊ အုပ်ချုပ်မှုဌာနခွဲမှတပ်ဖွဲ့ဝင်များသည် ဇွန် ၁၃ ရက်၊ နံနက် ၁၁ နာရီခွဲအချိန်တွင် ရန်ကုန်မြို့တွင်းပြေးဆွဲလျက်ရှိသော YBS ယာဉ်လိုင်းများနှင့် YBS ကား မှတ်တိုင်များတွင် ခါးပိုက်နှိုက်ဖမ်းဆီးရမိရေး ဆောင်ရွက်ခဲ့ရာ သင်္ဃန်းကျွန်းမြို့နယ်၊ လေးထောင့်ကန်လမ်းမကြီး၊ အသင်းတိုက်ကားမှတ်တိုင်၌ YBS-7 ယာဉ်ပေါ်မှဆင်းလာသည့် ခါးပိုက်နှိုက်သတင်း ရှိသူ ဇော်လတ်(ခ)ရှထစ် အား တွေ့ရှိစစ်ဆေးရာ ၎င်းလွယ်ထားသောကျောပိုးအိတ်အတွင်းမှ ငွေ ၂၈,၅၀၀ ကျပ်မှာ အဆိုပါယာဉ်ပေါ်ပါ အသက်(၄၀)နှစ်ခန့်ရှိ အမျိုးသမီး(၁)ဦး၏ လက်ကိုင်အိတ်အတွင်းမှ နှိုက်ယူခဲ့ခြင်းဖြစ်ကြောင်း စစ်ဆေး ပေါ်ပေါက်သဖြင့် ဖမ်းဆီးခဲ့ပါသည်။
အလားတူ ဇွန် ၁၅ ရက်၊ နံနက် ၉ နာရီအချိန်တွင် မြောက်ဥက္ကလာပမြို့နယ်၊ အဝိုင်း ကားမှတ်တိုင်၌ YBS-42 ယာဉ်ပေါ်မှ ဆင်းလာသည့် ခါးပိုက်နှိုက်သတင်းရှိသူ နေဖုန်းအောင်(ခ) ဖိုးဇော်(ခ)ညီညီ၊ နိုင်လင်းဝေနှင့် ကျော်ဆန်းလွင်တို့ ၃ ဦးအား တွေ့ရှိစစ်ဆေးရာ ၎င်းတို့လက်အတွင်း ကိုင်ဆောင်ထားသော ငွေ ၂၁,၀၀၀ ကျပ် မှာ အဆိုပါယာဉ်ပေါ်ပါ အသက်(၄၅)နှစ်ခန့်ရှိ အမျိုးသား(၁)ဦး၏ ကျောပိုးအိတ်အတွင်းမှ လူကာ၍ နှိုက်ယူခဲ့ ခြင်းဖြစ်ကြောင်း စစ်ဆေးပေါ်ပေါက်ပါသည်။
စစ်ဆေးပေါ်ပေါက်ချက်အရ သက်သေခံပစ္စည်းများအား ပြန်လည်သိမ်းဆည်းပြီး ခါးပိုက်နှိုက်မှု ကျူးလွန်သူ ဇော်လတ်(ခ)ရှထစ်နှင့် နေဖုန်းအောင်(ခ)ဖိုးဇော်(ခ)ညီညီ ပါ(၃)ဦးကို ဥပဒေနှင့် အညီ အမြန်တရားစွဲတင်ပို့နိုင်ရေး ဆောင်ရွက်လျက်ရှိကြောင်း သိရသည်။
ဆွေဦး
