ဂျာကာတာ ဇန်နဝါရီ ၁၁
အင်ဒိုနီးရှားနိုင်ငံတွင် မြေပြိုမှုကြောင့် ကယ်ဆယ်ရေးလုပ်နေစဉ် နောက်ထပ်မြေပြိုမှုဖြစ်ပွားခဲ့၍ ကယ်ဆယ်ရေးသမားများပါ သေဆုံးခဲ့ကြောင်း အရာရှိများက ပြောသည်။
ပြီးခဲ့သည့် စနေနေ့က အနောက်ပိုင်းဂျာဗားပြည်နယ်၏ ဆီဟန်ဂျူအန်ရွာတွင် မိုးသည်းထန်စွာ ရွာသွန်းခဲ့၍ မြေပြိုမှု ဖြစ်ပွားခဲ့သည်။ ကယ်ဆယ်ရေးသမားများက မြေပြိုမှုတွင် အသက်ရှင်လွတ်မြောက် သူများကို ရွှေ့ပြောင်းပေးနေစဉ် နောက်တစ်ကြိမ် မြေပြိုခဲ့သည်။
မြေပြိုမှု ၂ ကြိမ်ကြောင့် အသက် ၆ နှစ်အရွယ် ကလေးငယ်တစ်ဦးအပါအဝင် အနည်းဆုံး လူ ၁၂ ဦး သေဆုံးခဲ့ပြီး လူဒါဇင်ပေါင်းများစွာ ပျောက်ဆုံးလျက် ရှိသည်။ ဆီဟန်ဂျူအန်ရွာမှာ ဂျာကာတာမြို့ အရှေ့တောင်ဘက် ၉၅ မိုင်အကွာတွင်တည်ရှိပြီး အချိန် ၃ နာရီခွဲ အတွင်း မြေပြိုမှု ၂ ကြိမ် ဖြစ်ပွားခဲ့ခြင်းဖြစ်သည်။
အင်ဒိုနီးရှားနိုင်ငံမှာ မိုးရာသီတွင် မြေပြိုမှုများ ကြုံတွေ့လေ့ရှိပြီး မြေပြိုမှုကြုံရခြင်းမှာ သစ်တော ပြုန်းတီးမှုကြောင့်ဟု ထောက်ပြလေ့ရှိသည်။ မြေပြိုမှုကြောင့် သေဆုံးသူများတွင် ကယ်ဆယ်ရေးသမားများ ပါဝင်နေသည်ဟု ယုံကြည်ထားကြောင်း ဘေးအန္တရာယ်သက်သာလျော့ပါးစေရေး အေဂျင်စီ၏ ပြောရေးဆိုခွင့် ရှိသူက ပြောသည်။
(KNT)