ရွှေဘိုမြို့တွင် ငွေကျပ် ၁၈၂၂ ဒသမ ၅ သိန်း တန်ဖိုးရှိ စိတ်ကြွရူးသွပ် ဆေးပြားများနှင့် စိတ်ကြွရူးသွပ်ဆေးပြားအကြေမှုန့်များ ဖမ်းဆီးရမိ
ရွှေဘို၊ ဇန်နဝါရီ ၁
ဒီဇင်ဘာ ၃၀ ရက်၊ မွန်းလွဲ ၁ နာရီ ၄၅ မိနစ်အချိန် ရွှေဘိုမြို့မရဲစခန်းမှတပ်ဖွဲ့ဝင်များသည် ရွှေဘိုမြို့၊ အမှတ်(၁၀)ရပ်ကွက်၊ ရန်ကြီးအောင်လမ်း၊ သက္ကယ်တန်းချောင်းတံတားထိပ်တွင် ဟိန်းထက် မောင်းနှင်လာသည့် မော်တော်ဆိုင်ကယ်အား ရပ်တန့်ရှာဖွေရာ ဆိုင်ကယ်ရှေ့ခွကြားရှိ ခြင်းအတွင်းမှ စိတ်ကြွရူးသွပ်ဆေးပြား ၃၄,၄၅၀ ပြား၊ စိတ်ကြွရူးသွပ်ဆေးပြား အကျိုးအကြေအမှုန့် ၀ ဒသမ ၂ ကီလို သိမ်းဆည်းရမိခဲ့သဖြင့် ဟိန်းထက်(၂၉)နှစ်အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါး များဆိုင်ရာဥပဒေအရ အရေးယူ ထားကြောင်း သိရသည်။
ဒီဇင်ဘာ ၃၀ ရက်၊ ညနေ ၄ နာရီခွဲအချိန် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များ သည် နောင်ချိုမြို့နယ်၊ မူဆယ်-မန္တလေးသွားကားလမ်း၊ မိုင်တိုင်အမှတ်(၈၀/၄)တွင် မြင့်လွင် မောင်းနှင် လာသော မော်တော်ဆိုင်ကယ်နှင့် ရှေ့ပြေးအဖြစ် ဇော်မင်းထွန်းမောင်းနှင်ပြီး မောင်မောင်လိုက်ပါလာသော မော်တော်ဆိုင်ကယ်တို့ကို ရပ်တန့်ရှာဖွေရာ မြင့်လွင် လွယ်ထားသော ကျောပိုးအိတ်အတွင်းမှ စိတ်ကြွရူးသွပ် ဆေးပြား ၁၂,၆၀၀ ပြား သိမ်းဆည်းရမိခဲ့သဖြင့် မြင့်လွင်(၃၃)နှစ်၊ ဇော်မင်းထွန်း (၃၆)နှစ်၊ မောင်မောင်(၂၃)နှစ် တို့အား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများ ဆိုင်ရာဥပဒေအရ အရေးယူထားကြောင်း သိရသည်။
ဆွေဦး
