လွှတ်တော်ဖွံ့ဖြိုးရေးရန်ပုံငွေဖြင့် ဆောင်ရွက်မည့်ရပ်ကွက် ဖွံ့ဖြိုးရေးလုပ်ငန်းများ ညှိနှိုင်းဆွေးနွေး၊ ကွင်းဆင်းစိစစ်ဆောင်ရွက်
မန္တလေး ဒီဇင်ဘာ ၂၇
လွှတ်တော်ဖွံ့ဖြိုးရေးရန်ပုံငွေဖြင့် ဆောင်ရွက်မည့် ရပ်ကွက်ဖွံ့ဖြိုးရေးလုပ်ငန်းများညှိနှိုင်းအစည်း အဝေးကို ဒီဇင်ဘာ ၂၆ ရက်က ချမ်းအေးသာစံမြို့နယ် အုပ်ချုပ်ရေးမှူးရုံးတွင် ကျင်းပရာမြို့နယ်အုပ်ချုပ်ရေးမှူးနှင့်ရပ်ကွက် (၂၀) မှ ရပ်ကွက်အုပ်ချုပ်ရေးမှူးများ၊ ရပ်ကွက်ဖွံ့ဖြိုးရေးအထောက်အကူပြုအဖွဲ့များတက်ရောက်ကြသည်။ အစည်းအဝေးတွင် ချမ်းအေးသာစံမြို့နယ်ပြည်သူ့လွှတ်တော်ကိုယ်စားလှယ်ဦးမျိုးနိုင်က ၂၀၂၀/၂၀၂၁ ခုနှစ် လွှတ်တော်ဖွံ့ဖြိုးရေးရန်ပုံငွေဖြင့် ဆောင်ရွက်ပေးမည့်ကတ္တရာလမ်းခင်းခြင်းလုပ်ငန်း ၄ ခု၊ ကွန်ကရစ်လမ်းခင်းခြင်းလုပ်ငန်း ၇ ခု၊ ရေမြောင်းဖောက်လုပ်ခြင်းလုပ်ငန်း ၅ ခုနှင့် ကျောက်ချောလမ်းခင်းခြင်း လုပ်ငန်း ၁ ခုတို့ ဆောင်ရွက်ပေးနိုင်ရေးလျာထားမှုများအား ရှင်းလင်းပြောကြားသည်။ ထို့နောက် တက်ရောက် လာသောရပ်ကွက်အုပ်ချုပ်ရေးမှူးများက ရပ်ကွက်ဖွံ့ဖြိုးရေးလုပ်ငန်းများကို အကြံပြုဆွေးနွေးကြသည်။
ထို့နောက် ချမ်းအေးသာစံမြို့နယ် ပြည်သူ့လွှတ်တော်ကိုယ်စားလှယ်၊ မြို့နယ်အုပ်ချုပ်ရေးမှူး၊ မြို့နယ် စည်ပင်သာယာအုပ်ချုပ်ရေးမှူးရုံးမှ မြို့နယ်အင်ဂျင်နီယာအဖွဲ့နှင့်အတူ ရပ်ကွက်များသို့သွားရောက်၍ မြေပြင် အခြေအနေကို ကွင်းဆင်းစိစစ်ပေးခဲ့ကြသည်။
မောင်ပြည်သူ(မန္တလေး)
