မြန်မာနိုင်ငံဆရာဝန်အသင်း(မန္တလေးတိုင်းဒေသကြီး)မှ အခမဲ့ဖျားနာ ရောဂါစစ်ဆေးကုသည့် ဆေးခန်းများဖွင့်လှစ်မှု သုံးသပ်ဆွေးနွေး၊ ကျန်းမာရေးပစ္စည်းများလှူဒါန်း
မန္တလေး ဒီဇင်ဘာ ၁၈
မြန်မာနိုင်ငံဆရာဝန်အသင်း (မန္တလေးတိုင်းဒေသကြီး)နှင့် စေတနာဆရာဝန်များပူးပေါင်း၍ မန္တလေးခရိုင် အတွင်း အောင်မြေသာဇံ၊ ချမ်းအေးသာစံနှင့်ချမ်းမြသာစည်မြို့နယ်များတွင် အခမဲ့ဖျားနာကုဆေးခန်းဖွင့်လှစ် ခဲ့မှု သုံးသပ်ခြင်းနှင့်မဟာအောင်မြေမြို့နယ်တွင် အခမဲ့ဆေးခန်းဖွင့်လှစ်ရေးညှိနှိုင်းအစည်းအဝေးကို ဒီဇင်ဘာ ၁ရ ရက် မွန်းလွဲ ၁ နာရီက ချမ်းအေးသာစံမြို့နယ် ၃၁ လမ်းရှိ မြန်မာနိုင်ငံဆရာဝန်အသင်း (မန္တလေးတိုင်းဒေသကြီး) ရတနာပုံခန်းမတွင်ကျင်းပသည်။
အခမ်းအနားတွင် မြန်မာနိုင်ငံဆရာဝန်အသင်း(မန္တလေးတိုင်းဒေသကြီး)ဥက္ကဌ ပါမောက္ခဒေါက်တာ ခင်မောင်မြင့်က အဖွင့်အမှာစကားပြောကြားပြီး ကိုရိုနာဗိုင်းရပ်ကာကွယ်ထိန်းချုပ်ကုသရေးအဖွဲ့ဥက္ကဌ ဒေါက်တာခင်မောင်ကျော်က မန္တလေးခရိုင်အတွင်းပိုးတွေ့လူနာများတွေ့ရှိရမှု များပြားလာသဖြင့် အခမဲ့ဖျားနာကုဆေးခန်းများတိုးချဲ့ဖွင့်လှစ်နိုင်ရေးပြင်ဆင်ဆောင်ရွက်မှုများကို တင်ပြသည်။ ထိုနောက်မြန်မာနိုင်ငံဆရာဝန်အသင်း အမှုဆောင်များကအကြံပြုဆွေးနွေးကြသည်။ ဆက်လက်၍ မြန်မာနိုင်ငံဆရာဝန်အသင်း(မန္တလေးတိုင်းဒေသကြီး)သို့ Dato KyaThiHninကN95 နှာခေါင်းစည်းများ အခု ၂ဝဝ ကိုလည်းကောင်း၊ မန္တလေးမြို့ လေအေးစက်ပြုပြင် ထိန်းသိမ်းရေးအသင်းဥက္ကဌဦးသိန်းတန်က လေအေးစက်(၁)လုံး ကိုလည်းကောင်း၊ PSI မြန်မာမှ PPE ဝတ်စုံ ၁၅ဝအားလည်းကောင်း လှူဒါန်းရာ မြန်မာနိုင်ငံဆရာဝန်အသင်း(မန္တလေးတိုင်းဒေသကြီး)ဥက္ကဌကလက်ခံရယူ ပြီး ဂုဏ်ပြုလွာပေးအပ်သည်။
မြန်မာနိုင်ငံဆရာဝန်အသင်း(မန္တလေးတိုင်းဒေသကြီး)နှင့် စေတနာဆရာဝန်များပူးပေါင်းကာ ဖျားနာ ကုဆေးခန်း Fever Clinic ကို ချမ်းမြသာစည်မြို့နယ် ထွန်တုံးဒေသန္တရဆေးခန်း၊ အောင်မြေသာဇံမြို့နယ် ၁၂ လမ်း မြို့နယ်ကျန်းမာရေးဦးစီးမှူးရုံးနှင့်ချမ်းအေးသာစံမြို့နယ် ဗြဟ္မစိုရ်လူမှုရေးအသင်းတို့တွင်ဖွင့်လှစ်ပြီး ဖျားနာလူနာ များကို အခမဲ့ကျန်းမာရေးစစ်ဆေးကုသပေးခဲ့သည်။
မောင်ပြည်သူ(မန္တလေး)
