မန္တလေး နိုဝင်ဘာ ၃၀
အမှတ်(၁)ရေကြောင်း ရဲကွပ်ကဲမှုအဖွဲ့ခွဲ(မန္တလေး)ကွပ်ကဲမှုအောက်ရှိ ရေယာဉ်(၁၅၉)မှ ဒုရဲမှူး ဖြိုးသီဟ ဦးစီးသော ရေကြောင်းရဲတပ်ဖွဲ့ဝင်များသည် နိုဝင်ဘာ ၂၈ ရက်၊ နံနက် ၁၁ နာရီ၊ မိနစ် ၄၀ က မတ္တရာမြို့နယ် သစ်တောဦးစီးဌာနမှ တောအုပ်ကြီးဦးဝင်မောင် ဦးစီးအဖွဲ့နှင့်ပူးပေါင်း၍ ဧရာဝတီမြစ်ကြောင်းတလျှောက် တရားမဝင်သစ်သယ်ဆောင်မှုများ လျော့နည်းရေး လှည့်ကင်းဆောင်ရွက်စဉ် မန္တလေးတိုင်းဒေသကြီး၊ မတ္တရာ မြို့နယ်၊ ဥဒိန်ရွာအနောက်ဘက်၊ သူဌေးကုန်ရေကာတာအနီးတွင် ဝါးဖောင် ၄ ဗျက်အား ပိုင်ရှင်မဲ့ တွေ့ရှိရသဖြင့် စစ်ဆေးရာဖောင်ပေါ်တွင် ဝါးများနှင့်တွဲလျက် ကျွန်းခွဲသားဆိုဒ်စုံ ၈၄ ချောင်း၊ ၂ ဒသမ ၂၈ တန်၊ ကျွန်းခွဲခြမ်း ၆၂ ချောင်း ၂ ဒသမ ၄၉ တန်၊ ၃ ပေအောက် ကျွန်းသစ်လုံး ၅၁ လုံး ၃ ဒသမ ၇၅ တန် စုစုပေါင်း ၈ ဒသမ ၅၃ တန် စုစုပေါင်းကာလတန်ဖိုး ၄၆ ဒသမ ၄၅ သိန်းဖိုးခန့် ပိုင်ရှင်မဲ့သိမ်းဆည်းရမိပြီး ယင်းသစ်များ အား မတ္တရာမြို့နယ်၊ စိန်ပန်းကုန်သစ်တောဘိနယ်သစ်တောရုံးတွင် သိမ်းဆည်းပြီး သစ်သယ်ဆောင်လာသူများအား စုံစမ်းဖော်ထုတ်လျက်ရှိသည်။
မောင်ပြည်သူ(မန္တလေး)