သမ္မတပူတင်ကို တရားစွဲဆိုမှုမှကင်းလွတ်ခွင့်ပေးမည့် ဥပဒေကြမ်းကို ရုရှားအောက်လွှတ်တော် ထောက်ခံ

နိုဝင်ဘာ  ၁၈၊ မော်စကို

သမ္မတရာထူးမှ အနားယူပါက သမ္မတနှင့် ယင်းတို့၏မိသားစုများကို ပြစ်မှုဆိုင်ရာ တရားစွဲဆိုမှုမှ ကင်းလွတ်ခွင့်ပေးမည့် ဥပဒေကြမ်းကို ရုရှားအောက်လွှတ်တော် (Duma) က ထောက်ခံခဲ့သည်။ အဆိုပါအချက်မှာ ပြီးခဲ့သည့်ဇူလိုင်လက ပြည်သူ့ဆန္ဒခံယူပွဲတွင် အတည်ပြုခဲ့သည့် အခြေခံဥပဒေပြင်ဆင်ချက်တစ်ခုဖြစ်သည်။ ရုရှားနိုင်ငံ၏ လွှတ်တော်နှစ်ရပ်လုံးတွင် သမ္မတပူတင်အပေါ် အားပေးထောက်ခံသူများသာ လွှမ်းမိုးထားသည်။

ပူတင်၏ စတုတ္ထမြောက် သမ္မတသက်တမ်းမှာ ၂၀၂၄ ခုနှစ်တွင် သက်တမ်းကုန်ဆုံးမည်ဖြစ်သော်လည်း အခြေခံဥပဒေပြင်ဆင်ချက်များအရ ယင်းကို နောက်ထပ်သက်တမ်း ၂ ကြိမ် ထပ်မံရွေးကောက်ခွင့်ပြုထားသည်။ ပူတင်မှာ လက်ရှိအချိန်တွင် အသက် ၆၈ နှစ်ရှိနေသော်လည်း ယင်း၏နေရာတွင် အစားထိုးဆက်ခံမည့်သူ မရှိသေးပေ။

ရုရှားနိုင်ငံ၏ အဓိကအတိုက်အခံခေါင်းဆောင် နာဗယ်နီက '' ပူတင်က ဘာကြောင့် တရားစွဲဆိုမှုကနေ ကင်းလွတ်ခွင့်ဥပဒေ လိုနေရတာလဲ၊ အာဏာရှင်တွေက သူတို့သဘောနဲ့သူတို့ ရာထူးကနေ ဆင်းနိုင်ကြလို့လား'' ဟု တွစ်တာပေါ်တွင် ရေးသားထားသည်။
အဆိုပါဥပဒေကြမ်းကို အောက်လွှတ်တော်တွင် နောက်ထပ် ၂ ကြိမ်တိုင်တိုင် ဖတ်ကြားတင်ပြပြီးနောက် အထက်လွှတ်တော်တွင် မဲခွဲဆုံးဖြတ်မှုခံယူမည်ဖြစ်ပြီး သမ္မတပူတင်က ဥပဒေအဖြစ် အတည်ပြုနိုင်ရန် လက်မှတ်ရေးထိုးရမည်ဖြစ်သည်။

Ref:BBC(KNT)