ဟိုတယ်နှင့်ခရီးသွားလာရေးဝန်ကြီးဌာန နှစ်ပတ်လည်အခမ်းအနားကို Online မှ ကျင်းပမည်

နေပြည်တော်  နိုဝင်ဘာ ၁၈

၂၀၂၀ ပြည့်နှစ်တွင် ဟိုတယ်နှင့်ခရီးသွားလာရေးဝန်ကြီးဌာန တည်ထောင်ခဲ့သည်မှာ (၂၈)နှစ်ပြည့်ပြီ ဖြစ်သည့်အတွက် ယခင်နှစ်များတွင် အကြောင်းကြောင်းကြောင့် မကျင်းပဖြစ်ခဲ့ခြင်းကြောင့်ဝန်ကြီးဌာန နှစ်ပတ်လည်အခမ်းအနားကို နိုဝင်ဘာ ၂၄ ရက်တွင် ကျင်းပသွားမည်ဖြစ်ကြောင်း သိရသည်။

ယင်းသို့ ကျင်းပရာတွင် COVID-19 ကပ်ရောဂါကူးစက်မှုကို ထိန်းသိမ်းကာကွယ်ရန် Online မှတစ်ဆင့် ကျင်းပမည်ဖြစ်ပြီး ဝန်ကြီးဌာနရှိ အရာထမ်း၊ အမှုထမ်းများထဲမှ ထူးချွန်ဝန်ထမ်းများကို ရွေးချယ်ကာ ထူးချွန်ဆု ချီးမြှင့်သွားမည့်အစီအစဉ်လည်း ပါဝင်ကြောင်း၊ ထူးချွန်ဝန်ထမ်းရွေးချယ်ရာတွင် အထက်အရာရှိ၏ ပေးမှတ်ကိုသာမက အရာထမ်းအချင်းချင်း၊ အမှုထမ်းအချင်းချင်းပေးမှတ်ကိုပါ ထည့်သွင်းစဉ်းစားသွားမည် ဖြစ်ကြောင်း သိရသည်။

လက်ရှိတွင် ဟိုတယ်နှင့်ခရီးသွားလာရေးလုပ်ငန်းများအနေဖြင့် COVID-19 ကပ်ရောဂါကြောင့် ထိခိုက်ခဲ့ရသည့် ခရီးသွားလုပ်ငန်းပြန်လည် ရှင်သန်ရန် Myanmar Tourism Strategic Rescue Roadmap MTSRR ကိုနိုင်ငံတကာကျွမ်းကျင်သူများနှင့် အမျိုးသားအဆင့်ရေးဆွဲအတည်ပြုပြီးဖြစ်ကြောင်း၊ COVID-19 ရောဂါ ကူးစက်မှုကို ထိန်းချုပ်နိုင်ရန် ပြည်သူများ၏ လူမှုစီးပွားရေးဘဝကို အတိုင်းအတာတစ်ခုအထိ ကန့်သတ်မှုများ ပြုလုပ်ထားသည့်အတွက် ရေရှည်တွင် စားဝတ်နေရေးအတွက် COVID-19 ရောဂါကူးစက်မှုကို ထိန်းချုပ်ကာကွယ်နိုင်သော နည်းလမ်းမျိုးဖြင့် လုပ်ငန်းများပြန်လည်စတင်ရန် လိုအပ်မည်ဖြစ်ကြောင်း သိရသည်။

ထို့အပြင် ဝန်ကြီးဌာနအနေဖြင့် Enchanting Myanmar Health & Safety Protocols for Safe Tourism Myanmar ကို ရေးဆွဲပြုစုပြီးဖြစ်ကာ လုပ်ငန်းများကို Protocol နှင့်အညီလိုက်နာပြီး ပြန်လည် စတင်နိုင်ရန်  Industry ကို သင်တန်းတွေပေးသွားရမည်ဖြစ်ကြောင်း၊သင်တန်းဆရာများ၏ လိုက်နာမှုကို စစ်ဆေးမည့် Inspector များကိုလည်း အမျိုးသားအဆင့် အသိအမှတ်ပြုလက်မှတ်များ ထုတ်ပေးရန်ရှိကြောင်း သိရသည်။

မေဘယ်လ်အောင်