နိုဝင်ဘာ ၈
ဆောက်သမ်တန်အသင်းဟာ ၂၀၁၆ ခုနှစ် မတ်လနောက်ပိုင်း ပထမဆုံးအကြိမ်အဖြစ် ပရီးမီးယားလိဂ် ပြိုင်ပွဲမှာ ၃ ပွဲဆက်တိုက်နိုင်ပွဲရခဲ့ပါတယ်။ ဆောက်သမ်တန်ဟာ အခုရာသီ ပရီးမီးယားလိဂ်ပွဲမှာ ခြေစွမ်းပြနေ ပါတယ်။ သောကြာနေ့နံနက်က ပရီးမီးယားလိဂ်ပွဲစဉ် ၈ အဖြစ် နယူးကာဆယ်အသင်းနဲ့ ကစားရာမှာ ဆောက်သမ်တန်တို့က ၂−၀ ရလဒ်နဲ့ အနိုင်ရခဲ့ပါတယ်။ ဒီနိုင်ပွဲကြောင့် ပရီးမီးယားလိဂ်အမှတ်ပေးဇယားကို တစ်ပွဲအသာနဲ့ ပထမဆုံးအကြိမ် ဦးဆောင်နိုင်ခဲ့ပါတယ်။ ဆောက်သမ်တန်တို့ ပရီးမီး ယားလိဂ်မှာ ၈ ပွဲကစားပြီး ၅ ပွဲနိုင် ၁ ပွဲသရေ ၂ ပွဲရှုံးရလဒ်နဲ့ ၁၆ မှတ်ရရှိထားပါတယ်။ ဆောက်သမ်တန်ဟာ ပြီးခဲ့တဲ့ရာသီက လက်စတာ အသင်းကို ၉−၀ ရလဒ်နဲ့ အရှက်ရဖွယ် ရှုံးနိမ့်ခဲ့ရပါတယ်။ ဒါကြောင့် နည်းပြဟာဆန်ဟူသယ်လ် ထုတ်ပယ်ခံရဖို့ နီးစပ်ခဲ့ပါတယ်။ နောက်ပိုင်းမှာ ပုံစံကောင်းတွေပြန်ရလာခဲ့လို့ အခုလို ထိပ်ဆုံးနေရာကို ရောက်ရှိခဲ့တာပါ။
ဟာဆန်ဟူသယ်လ်က “အလွန်ဂုဏ်ယူစရာပါ။ ကျွန်တော်တို့ဟာ ငွေကြေးအများအပြားရင်းနှီးမြှုပ်နှံလို့ တိုးတက်လာတာမဟုတ်ပေမယ့် အလုပ်တွေနဲ့ ရင်းနှီးမြုပ်နှံခဲ့လို့ အခုလို တိုးတက်လာတာပါ။ လွန်ခဲ့တဲ့ ၂ လ ၃ လထဲက ကျွန်တော်တို့ရလဒ်ကောင်းအချို့ ရရှိခဲ့ပါတယ်။ လူတိုင်း အမြင့်ဆုံးအဆင့်မှာရှိနေချင်ကြပါတယ်။ ကျွန်တော်တို့လုပ်နေတာတွေက နည်းနည်းတော့ ကြောက်ဖို့ကောင်းပါတယ်။ ဒါပေမယ့် အံ့အားသင့်စရာတော့ မဟုတ်ပါဘူး။ ဘာဖြစ်လို့လဲဆိုရင် ကျွန်တော်တို့က အလုပ်လုပ်နေလို့ပါပဲ”လို့ ပြောခဲ့ပါတယ်။
(SO)