ရဲတပ်သားအား သံတုတ်နှင့်ရိုက်၍ ဆိုင်ကယ်နှင့် ဖုန်းလုယူခဲ့သူများကို ဖမ်းဆီး
မန္တလေး ဧပြီ ၃၀
ချမ်းမြရွှေပြည်ယာဉ်ရပ်နားစခန်းမှ တာဝန်ပြီးဆုံး၍ ဆိုင်ကယ်စီးပြီးပြန်လာသောရဲတပ်သား တစ်ဦးအား ဧပြီ ၂၆ ရက်၊ ည ၉ နာရီက သံတုတ်ဖြင့်ရိုက်၍ ဆိုင်ကယ်နှင့် ဖုန်းလုယူမှုဖြစ်ပွားခဲ့သည်။
ဖြစ်စဉ်မှာ စည်ပင်သာယာရဲတပ်ဖွဲ့မှ ရဲတပ်သားကျော်သူဝင်းသည် တာဝန်ပြီးဆုံး၍ ည ၈ နာရီ ၄၅ မိနစ်တွင် အရပ်ဝတ်ဖြင့် ချမ်းမြရွှေပြည်ယာဉ်ရပ်နားစခန်းမှ လမ်း ၆၀ နှင့် ၆၂ လမ်းကြား စံပယ်လမ်းရှိ စည်ပင် သာယာရဲတပ်ဖွဲ့ဝန်ထမ်းလိုင်းသို့ ဆိုင်ကယ်စီးပြီး ပြန်လာစဉ် လမ်း ၆၀ နှင့် ငုရွှေဝါလမ်းထောင့်အရောက် ဆိုင်ကယ်နှစ်စီးဖြင့် လူငယ် ၅ ဦးက သံတုတ်ဖြင့်ရိုက်၍ ယင်း၏ဆိုင်ကယ်နှင့်ဖုန်းကို လုယူထွက်ပြေးခဲ့သည်။
အဆိုပါဖြစ်စဉ်နှင့်ပတ်သက်၍ ပြစ်မှုကျုးလွန်သူများ အမြန်ဖမ်းဆီးရမိရေး မန္တလေးတိုင်းဒေသကြီး မှုခင်းအကူရဲတပ်ဖွဲ့ဝင်များက စုံစမ်းဆောင်ရွက်ခဲ့ရာ ဧပြီ ၂၉ ရက်၊ မွန်းလွဲ ၂ နာရီတွင် ပြစ်မှုကျုးလွန်သူ ၅ ဦးအား ပြစ်မှုကျုးလွန်ရာတွင်အသုံးပြုသည့်ဆိုင်ကယ်များနှင့်အတူ ဖမ်းဆီးရမိသဖြင့် အမှတ်(၁၁)နယ်မြေ ရဲစခန်းက (ပ)၁၅၁/၂၀၂၀၊ ရာဇသတ်ကြီးပုဒ်မ ၃၉၄ ဖြင့် အမှုဖွင့်စစ်ဆေးလျက်ရှိသည်။
မောင်ပြည်သူ(မန္တလေး)
