အမာမြို့၊ နောက်မီးကျေးရွာက ညမထွက်ရဒေသန္တရအမိန့် မလိုက်နာသူ လေးဦးကို ထောင်ဒဏ်တစ်လစီချမှတ်
အမာ ဧပြီ ၃၀
ဖျာပုံခရိုင်၊ အမာမြို့ နောက်မီးကျေးရွာတွင်နေထိုင်သည့် ညမထွက်ရအမိန့်မလိုက်နာသူ လေးဦးအား ဖျာပုံမြို့နယ်တရားရုံးမှ ဧပြီ ၂၉ ရက်က အလုပ်မဲ့ထောင်ဒဏ်တစ်လစီ ပြစ်ဒဏ်ချမှတ်ခဲ့သည်။
ဖြစ်စဉ်မှာ ဧပြီ ၂၈ ရက်၊ ညသန်းခေါင် ၁ နာရီခွဲခန့် အမာနယ်မြေရဲစခန်းမှ နယ်ထိန်းခေါင်းဆောင် ဒုရဲအုပ်နောင်နောင်၊ နောက်မီးရဲကင်းမှရဲတပ်ကြပ်ဇော်ထွန်းလင်းနှင့် ရဲတပ်သားနှစ်ဦး၊ နောက်မီးကျေးရွာ အုပ်စု အုပ်ချုပ်ရေးမှူးဦးရင်စိန်နှင့် ရပ်ကွက်ရာအိမ်မှူးနှစ်ဦးတို့ပူးပေါင်းအဖွဲ့ လှည့်ကင်းဆောင်ရွက်နေစဉ် နောက်မီးကျေးရွာ သင်္ချိုင်းရှေ့၌ ဦးစိုးတင်(၅၃)နှစ်၊ (၉)ရပ်ကွက်၊ ဦးအေးနိုင်(၂၉)နှစ်၊ (၅)ရပ်ကွက်၊ ဦးနိုင်စိုး(၃၈)နှစ်၊ (၉)ရပ်ကွက်၊ ဦးကျော်နိုင်ထွန်း(၂၆)နှစ်၊ (၅)ရပ်ကွက် နောက်မီးကျေးရွာနေထိုင်သူများအား တွေ့ရှိ၍မေးမြန်းရာ ကောင်းစွာဖြေဆိုနိုင်ခြင်းမရှိခဲ့ကြောင်း၊ ကူးစက်ရောဂါကာကွယ်ရေးအရ ည ၁၀ နာရီမှ နောက်တစ်နေ့နံနက် ၄ နာရီအထိ မည်သူမျှအပြင်မထွက်ရန် ထုတ်ပြန်ထားသည့် ဒေသန္တရအမိန့်(၂/၂၀၂၀) အား လိုက်နာခြင်းမရှိသည့်အတွက် ဆက်လက်ထိန်းသိမ်းနိုင်ရေး၊ ဥပဒေအရအရေးယူဆောင်ရွက်နိုင်ရေး အမာမြို့အထွေထွေအုပ်ချုပ်ရေးဦးစီးဌာနသို့ တင်ပြခဲ့သည်။
COVID-19 ရောဂါထိန်းချုပ်ရေးနှင့် အရေးပေါ်တုံ့ပြန်ရေးကော်မတီ၊ ဖျာပုံမြို့နယ်အုပ်ချုပ်ရေးမှူး ဦးသိန်းစိုးက မြို့နယ်တရားရုံးသို့ ဦးတိုက်လျှောက်ထားခဲ့ရာ မြို့နယ်တရားရုံးက ရာဇသတ်ကြီးပုဒ်မ(၁၈၈) အရ အမိန့်မလိုက်နာသူလေးဦးအား အလုပ်မဲ့ထောင်ဒဏ်တစ်လစီ ပြစ်ဒဏ်ချမှတ်ခဲ့ကြောင်း သက်ဆိုင်ရာမှ သိရသည်။
ဝင်းမြင့်အောင်(ပြန်/ဆက်)
