ရောဂါမကူးစက်နိုင်သူများဟု သတ်မှတ်ပေးသည့် နိုင်ငံကူးလက်မှတ် ထုတ်မပေးသင့်ကြောင်း WHO သတိ‌ပေး

ဧပြီ ၂၆၊ ဂျီနီဗာ ပိတ်ဆို့မှုများကို ဖြေလျှော့ပေးသည့်အနေဖြင့် ကမ္ဘာ့နိုင်ငံများ၏ အစိုးရများက ရောဂါ မကူးစက်နိုင်သူများဟု သတ်မှတ်ပေးသည့် နိုင်ငံကူးလက်မှတ် သို့မဟုတ် ရောဂါကူးစက်နိုင်ခြေ မရှိဆိုသည့် အသိအမှတ်ပြုလက်မှတ်များ ထုတ်မပေးသင့်ကြောင်း ကမ္ဘာ့ကျန်းမာရေးအဖွဲ့ချုပ်က ပြောသည်။ COVID-19 ရောဂါမှ ပြန်လည်သက်သာလာသူများမှာ ဒုတိယအကြိမ် ရောဂါကူးစက်ခံရခြင်းမှ ကာကွယ်ပေးသည့် ပဋိဇီဝပစ္စည်းများ ထုတ်လုပ်နိုင်သည့် သက်သေအထောက်အထားမရှိကြောင်း WHO က ပြောသည်။ ရောဂါမကူးစက်နိုင်သူများဟု သတ်မှတ်ပေးသည့် နိုင်ငံကူးလက်မှတ် သို့မဟုတ် ရောဂါကူးစက် နိုင်ခြေမရှိဆိုသည့် အသိအမှတ်ပြုလက်မှတ်များ ထုတ်ပေးခြင်းမှာ ဗိုင်းရပ်စ်ကူးစက်ပျံ့နှံ့မှုကို မြင့်တက် စေနိုင်သည်ဟု WHO က သတိပေးထားသည်။ ကိုယ့်ကိုယ်ကိုယ် ရောဂါမကူးစက်နိုင်ဟု ယူဆသူများမှာ ကြိုတင်ကာကွယ်မှု စည်းမျဉ်းများကို လိုက်နာမည်မဟုတ်ဟု WHO က ဆိုသည်။ ကိုရိုနာဗိုင်းရပ်စ်မှ ပြန်လည်သက်သာလာသူများကို ခရီးသွားခွင့် သို့မဟုတ် လုပ်ငန်းခွင်သို့ ပြန်လည်ဝင်ရောက်ခွင့်ပေးရန် နိုင်ငံအချို့၏ အစိုးရများက စဉ်းစားနေသည်။ ဗိုင်းရပ်စ်ပျံ့နှံ့မှုကို တားဆီးရန်အတွက် သွားလာလှုပ်ရှားမှု ကန့်သတ်သည့်စည်းမျဉ်းများ ချမှတ်ခြင်းမှာ ကမ္ဘာ့စီးပွားရေးကို ယိုင်နဲ့စေခဲ့သည်။ COVID-19 ရောဂါမှ ပြန်လည်သက်သာလာသူများကို သုတေသနပြုလုပ်ရာတွင် ယင်းတို့၏ သွေးများအတွင်း ပဋိဇီဝပစ္စည်းများ ထုတ်လုပ်ပေးနိုင်စွမ်းရှိကြောင်း တွေ့ရသည်။ သို့သော် အချို့သူများမှာ ပဋိဇီဝထုတ်လုပ်နိုင်စွမ်း အလွန်နည်းပါးကြောင်း တွေ့ရသည်။ အဆိုပါတွေ့ရှိချက်အရ ကိုယ်ခံအားစနစ်၏ အခြားအစိတ်အပိုင်းတစ်ခုဖြစ်သည့် T-cells များ( ရောဂါပိုးကူးစက်ခံရသည့်ဆဲလ်များကို တိုက်ဖျက်ပေးသည်)မှာ ရောဂါသက်သာ ပျောက်ကင်းရေး အတွက် အဓိကကျဖွယ်ရှိသည်။ Ref:BBC(KNT)