ရန်ကုန် စက်တင်ဘာလ ၂၉
ရန်ကုန်တိုင်းဒေသကြီးအစိုးရအဖွဲ့ ဝန်ကြီးချုပ် ဦးဖြိုးမင်းသိန်းသည် စက်တင်ဘာလ ၂၈ ရက် နေ့လည်က အစိုးရအဖွဲ့ဝင် ဝန်ကြီး များဖြစ်သော ရန်ကုန် မြို့တော်ဝန် ဦးမောင်မောင်စိုး၊ လူမှုရေးဝန်ကြီး ဦးနိုင်ငံလင်း၊ လူဝင်မှုကြီးကြပ်ရေးနှင့် လူ့စွမ်းအားအရင်းအမြစ်ဝန်ကြီး ဒေါ်မိုးမိုးစုကြည်၊ အတွင်းရေးမှူး ဦးစိုးစိုးဇော်၊ ပါမောက္ခ ဒေါက်တာဇော်ဝေစိုးနှင့် တာဝန်ရှိသူများလိုက်ပါကာ COVID-19 ကုသရေးဌာန (သုဝဏ္ဏ) ဧရာဝတီစင်တာ သို့သွားရောက်၍ ရောဂါထိန်းချုပ်ကာကွယ် ကုသရေးလုပ်ငန်းများဆောင်ရွက်နေသည့် အခြေအနေများအား ညှိနှိုင်းဆွေးနွေး ပြီး လမ်းညွှန်မှာကြားခဲ့ကြသည်။
ဆက်လက်၍ တိုင်းဒေသကြီးဝန်ကြီးချုပ်နှင့်အဖွဲ့သည် ရွှေတိဂုံစေတီတော်အရှေ့ဘက်မုဘ်ရှိ ဓမ္မာရုံအဆောက်အဦီများနှင့် အဘိဓမ္မာဗိမ္မာန်တော် ငါးထပ်ဆောင်တို့ကို ကြည့်ရှု့ပြီး သံဃာတော်များအား COVID-19 ရောဂါထိန်းချုပ်ကာကွယ်ရေး အသွားအလာကန့်သတ်မှု Quarantine ထားရှိရန်လိုအပ်လာပါက ၎င်းဓမ္မာရုံများကို Quarantine Center များအဖြစ် အသုံးပြုနိုင်ရန်အတွက် ကြိုတင်ပြင်ဆင် ဆောင်ရွက်ထားရှိရန်တို့ကို တာဝန်ရှိသူများနှင့်အတူ သွားရောက်၍ဆွေးနွေးညှိနှိုင်းခဲ့ကြသည်။
၎င်းမှတဆင့် ဗိုလ်တစ်ထောင်မြို့နယ် ရှိ Community Based Facility Quarantine Center အဖြစ် အသုံးပြုမည့် Crown Advanced Construction Co.,Ltd ၏ COD အားကြည့်ရှု့စစ်ဆေးကာ အသုံးပြုနိုင်မည့်အခြေအနေတို့ကို ကုမ္ပဏီတာဝန်ရှိသူများနှင့် ညှိနှိုင်းဆွေးနွေးပြီး လိုအပ်ချက်များကို မှာကြားခဲ့ကြောင်းသိရသည်။
သတင်း မိုးမြင့်မောင်
ဓာတ်ပုံ ကျော်သူထက်